Fixemos chave de casualidade. Normalmente, despois de varias tiradas sen lle bater.
Categoría: Que é?
Que é …: “ben lanzado mais errado”?
Pois literalmente o que indica, ben lanzado mais non bateu na chave. Ás veces úsase a expresión “a chave furada”, van xustiños os pesos e non bate ningún.
Que é … “non me fales no pulso”?
Non me fales mentres estou apuntando. Non me distraias no momento que vou lanzar.
Que é … “corto, torto e mal ghindao!” ?
Pois, evidentemente, non necesita explicación. Un lanzamento nefasto.
E ten a súa contraparte: ben ghindao! (Expresión patrimonio de Pistón).
Que é … morrer sen campá?
Morrer sen campá: acabar a partida sen bater nunca na chave.
Que é … ” se a chegaras! ” ?
Hai unha idea insistente nos xogadores de Chave que consiste en que un tiro curto é algo desastroso.
Eu penso que tanto problema é o lanzamento curto como o lanzamento longo.
Se cadra esa frase debería entenderse en sentido amplo: “se constantemente lanzas curto, tes un problema e debes lanzar con máis forza”.
De feito, calquera defecto continuo que se teña nos lanzamentos haino que correxir, pode ser tiro curto, longo, torto, arrebolado, escapado da man, ou calquera outro.
(Expresión patrimonio do José)
Que é … un peseteiro?
Un peseteiro é un torneo onde cada participante pon un euro e as parellas fanse por sorteo, normalmente escollendo unha carta dunha baralla.
Que é …? Mostramos un xeito de anotar
Na foto vemos unha forma de anotar os resultados dun encontro. Os puntos indican un par fallado. As raias verticais indican unha chave feita. As dúas raias unidas por un trazo vertical indican que se fixo un par, as dúas chaves.
Por tanto nese partido Pablo-Jose fixeron 15 chaves gañando na 9 quenda e Enrique-Mera fixeron 10.